Yon nouvo sant kominotè Ayisyen ki dirije pa plizyè imigran ap chèche bay sipò pou kominote Ayisyen an ki pa sispann grandi nan Springfield. Haitian Community Health and Support Center an ap dirije pa lidè kominotè Ayisyen, sa ki ba li yon pozisyon inik, paske anpil resous pou gwoup sa a ap dirije pa òganizasyon ki san bi likratif yo ak gouvènman lokal, daprè sa pastè Ayisyen e prezidan komite sant kominotè a, Vilès Dorsainvil di. Li lokalize li nan 1530 South Yellow Springs St., ki se ansyen lokal sant evènman The L.
“Sa nou reyalize se ke pa te genyen okenn estrikti Ayisyen kòm yon òganizasyon popilè nan Springfield ki pran chaj kòm Ayisyen, avèk yon apwòch global oswa konplè,” Dorsainvil di. “... Nou ap travay pou asire ke si w ap chèche yon òganizasyon popilè ki ka entèvni pou kominote Ayisyen an nan zafè lojman, dokiman imigrasyon oswa papye legal, se pou sa nou ap kreye òganizasyon sa a pou li travay avèk kominote a.”
Sant la se yon “kafou” pou tout resous yo, daprè Dorsainvil, avèk objektif pou elimine nesesite pou Ayisyen ale nan plizyè òganizasyon pou jwenn sa yo bezwen. Li di yo ka vin nan sant kominotè a pou resevwa èd sou plas oswa pou yo dirije imedyatman kote yo bezwen ale.
Sant kominotè a ouvri lendi jiska vandredi, avèk objektif pou gen yon moun sou plas soti 8 a.m. rive 4 p.m. epi 4 p.m. rive 10 oswa 11 p.m., pou bay sèvis pou moun ki travay nan diferan orè, daprè Dorsainvil. Yo kòmanse ak yon ti ekip paske yo pa gen mwayen finansye pou anplwaye plis moun, men annatandan, pastè yo ap sou plas.
Dorsainvil di sant kominotè a resevwa anviwon $5,000 nan men Welcome Springfield, ki ap fèmen, epi yo ap aplike pou plis lajan.
Sant la gen plan pou elaji sèvis li yo, pou bay yon espas pou jèn yo eksprime tèt yo, pou granmoun yo resevwa diferan sèvis ak plis ankò, dapre Dorsainvil.
Li di sant kominotè a ap kolabore ak pastè lokal yo, Nehemiah Foundation ak Catholic Charities, epi li espere jwenn plis sipò nan pa trò lontan.
Carl Ruby, yon pastè nan Springfield ki travay ak kominote Ayisyen an e ki bay konsèy a òganizatè yo, di okòmansman, li menm ak lòt yo te panse yo ta pral ede kominote Ayisyen an, men li te wè kominote a pran inisyativ li. Ki fè kounya, li di li la pou ofri kèlkeswa konsèy lè sa nesesè.
Lidè yo nan sant kominotè a gen pwoksimite ak yon konpreyansyon natirèl pou moun ki vin chèche asistans, dapre Ruby. Yo ka simonte pwoblèm ki gen rapò ak lang ak baryè kiltirèl yo.
“Gen kèk sèvis ki difisil pou nou bay akòz de baryè lang ak kiltirèl yo, ke yo menm ap gen plis chans rezoud a chak fwa,” Ruby te di.
Ruby di anviwon 40 pastè te rankontre anvan pou koute manm kominote Ayisyen an epi fè yon lide sou bezwen espesifik yo apre yon aksidan mòtèl bis lekòl ki te enplike yon chofè Ayisyen san lisans te fè nou vinn mete plis aksan pou gen yon efò ki pi òganize. Li di lè sa kèk pastè Ayisyen te di yo pral kòmanse yon òganizasyon san bi likratif avèk objektif sa a e ke yo bezwen kèk èd.